Pelahaldarinn er fyrir 500ml pela til þess að hafa utan um hálsinn.
Pelahaldarinn er prjónaður ofanfrá og niður með útaukningum í berustykki og mynstur prjónað samkvæmt mynd. Ermalykkjur eru geymdar á meðan bolurinn er prjónaður og þær svo prjónaðar hvor í sínu lagi. Í lokin er þeim tyllt við bolinn með einu saumspori neðst. Hálsband er gert sér á sokkaprjóna og það svo fest við stroffið í lokin.
GARN Léttlopi frá Ístex eða það garn sem passar prjónfestunni. Aðallitur: u.þ.b. 30g Mynsturlitur: u.þ.b. 20g Athugið að ef annað garn er valið gæti það haft áhrif á stærð flíkurinnar auk þess að magnið gæti breyst.
PRJÓNAR Sokkaprjónar nr. 4,5 eða hringprjónn 80cm nr. 4,5 með magic loop aðferðinni. Ath. að sannreyna prjónfestu og breyta um prjónastærð ef þarf.
PRJÓNAFESTA Í SLÉTTU PRJÓNI 18 L = 10 cm
ANNAÐ Hjálparband eða næla Skæri, nál
Hönnuður: Fanney Rún Ágústsdóttir Dreifing og fjölföldun bönnuð Október 2023
